Home Adat Patua Hata Pesta Adat Batak

Patua Hata Pesta Adat Batak

405
0
  1. BORHAT MA UDURAN NI PARANAK TU JABU (HUTA) NI PARBORU

Dung dijalo parboru haro ro ni paranak, masuk ma uduran ni paranak      manjalangi      sude   keluarga ni parboru nanidapothon i. Dungsae marsijalangan (tong dope jong jong).

Protokol ni paranak: Mauliate ma dipasahat roha nami tu hamu sude tulang nami nang dohot nantulang, tona ni dainang namborumu do tu hami, tung naso jadi hami mangambe tangan molo ro mandapothon pamili  lumobi tulang nami, alani i, Huboan hami do silua nitangan  pinatupa ni hasuhuton nami mandapothon hamu, tulang, ninna roha nami nian jumolo sigati hamu ma.

Protokol ni parboru: Mauliate ma amangboru, on pe dihamu boru nami sigati hamu ma siboanon ni pariban muna, molo dung suman togihon hamu parboruon ni pariban muna asa dipature di dapur.

Boru ni par boru: Hubereng hami nungnga tingkos amang

Protokol ni par boru: Antong patupa hamu ma di dapur.(dung diboan sipanganon tu dapur). Songoni ma amangboru hundul ma hamu.

Protokol ni paranak: Di hamu tulang, paima dipature boru nami sipanganon nahuboan hami adong hata ni opputta sijolo jolo tubu namandok jolo tiniptip sanggar bahen huru huruan jolo sinukkun  marga asa binoto partuturan: Ia marga nami tulang……(didok margana)……, dipatandahon ma suhut bolon dohot sude uduran nasida:

Nion ma apala amanta hasuhuton inata br…….    ,dipatandahon ma angka uduranna i. Songoni ma tulang nantulang naboi patandahonnon nami tuhamu mauliate ma.

Protockol ni parboru: Mauliate ma amangboru ido tutu, adong hata ni tetangga seberang mandok, takkenal maka tak sayang, hami pe antong paboaon nami ma marga nami…….dipaboa margana……dohot sude,nasda satu persatu. Songoni ma amang boru mauliate ma.

Protokol ni paranak: Antong tulang naeng ro ma hami mandapothon hamu didia ma pasahaton nami?(dipasahat ma tudu tudu ni sipanganon) Mauliate ma par jolo di hamu, lumobi ma di amanta namartua Debata na papunguhon hita di bagas na marsangao namartua sigonggom nasa pagisi na on. Mansai las roha nami mandapothon hamu ala ni i hu boan hami do sipalas roha muna ima tudu tudu ni sipanganon tung songonon pe na boi hupatupa hami las ma antong roha ni badanmu las ma roha ni tondimu asa dohonon nami bagot na marhalto ma natubu di rubean horas ma hamu manjalo horas ma hami na mangalean.

Protokol nparboru: Antong songoni ma nang di hamu amangboru dison hupatupa hami do dekke asa mangarade ma hamu: Hami pe antong mansai las do roha nami manjalo haroro muna on, ala ni ido hupatupa hami do tu hamu dengke tio dengke sahat dengke simudur udur tangiang nami mai tu amanta namartua Debata asa sai mudur udur hamu rap tu dolok rap tu toruan tumpahan ni amanta Debata: asa hotang ni Pakkat ma binoan tu Parlilitan tudia pe hamu mangalangka disi ma hamu dapot parsaulian (dung dipasat dekke baru pe nasida marsijalangan.

Protokol ni paranak: Asa marsipanganon hita ise ma hita mambahen tangiang?

Protokol ni parboru: Ala hamu do napatupahon sipanganon asa amangboru ma na mambahen tangiang mangan, pinasahat ma tu amangboru.

Protokol ni paranak: songoni ma tulang?. Antong tapasada rohatta martangiang ma hita…………………………………………amin, sititi ma sigoppa golang golang pangarahut na otik so sadia pe na hupatupa hami sai godang ma pinasuna.martua mangan.

2. DUNG SAE I MARSIPANGANON MA

Protokol ni parboru: Songoni ma amang boru dison  dipasahat hamu do tu hami  tudu tudu ni sipanganon songon dia ma on amangboru?

Protokol ni paranak: Ima tutu tulang nakkin nungng hupasahat hami tu hamu tudu tudu ni sipanganon na marsaudara asa ipe tulang surung surung mai di rajai, mauliate ma.

Protokol ni parboru: Mauliate ma amangboru surung surung ma hape on  di hami. Boru nami boan hamu tu dapur aturhon hamu na hombar tu hatopanna. mauliate ma. (dung sikkop sude dimulai ma makkatai)

Protokol ni parboru: Jadi songoni ma amang boru asa tamulai makkata mangido tikki majolo hami asa martuptup jolo hami namarhaha anggi.

Protokol ni paranak: Nauli tulang.

Protokol ni parboru: (Dung martuptup parboru) dapot dos ni roha di nasida ise na gabe parsinabul: Antong songoni ma amangboru molo dung mangarade hamu asa mangkatai hita.

Protokol ni paranak: Mauliate ma tulang molo siat pangidoan nami asa mangido tikki majolo hami asa marsipasangapan jolo hami na mardongan tubu.

Parsinabul ni parboru: Ulahon amngboru.

Protokol ni paranak: (dung mardosni roha nasida) ditontuhon nasida ise parsinabul: jadi mauliate ma tulang ditikki napinasahat mu dihami, onpe raja hami nungnga magarade be hami, partikkian on pe hupasahat ma tu rajai.

2. MARHA ADAT (MAKKATAI)

Parsinabul Ni Parboru: ”Manghatai ma hita Raja ni Boru. Nunga tung las rohanami manganthon sipanganon nabinoan muna i. Bosur hami mangan indahan na las, sangat marlompan juhut na tabo sombu uas minum aek sitio-tio. Asi ma roha ni Tuhanta  dipasu-pasu ma i, asa pamurnas ma i tu daging, saudara tu bohi, sipalomak imbulu ma i, sipaneang holo-holi, jala sipasindak panaili.

Mauliate ma di hamu. Jala dohonon ma songon hata ni situa-tua:

Bagot namarhalto ma na  niagatan di robean,

Horas ma hami namanghasagathon,

Ditambai Tuhanta ma di hamu namangalean.

“Asa sai jolo ni nang nang do asa ni nung nung, sai jolo pinangan do asa nisungkun. Namanungkun ma hami tu hamu Raja ni Boru taringot tu sintuhu ni indahan masak dohot lompan na tabo i.

Pasinabul Ni Paranak:  Mauliate ma di rajai, andorang so nialusan tutu sukkun sukkun  ni rajai hami pe tung tangkas do huhilala hami holong ni Tuhantai taripar tu hami lumobi ma ditikki on dilehon tu hita partikkion gabe boi antong hami sahat sonang so hariboriboan tu tonga ni bagas ni raja on. Rajanami raja bolon ima tutu, na manukkun  ma rajai ditaringot ni sipanganon naso sadia I, asa dohonon nami ma godang sibutong butong otik si pir ni tondi, otik so sadia pe nahupatu hami sai godang ma pinasuna, asa songon nidok ni situa tua ma dohonon:

Bagot na marhalto ma niagatan di rubean,

Horas ma rajai manganhon horas ma hami na mangalean,

yanggo hata na rajanami  parhorason panggabean do ,botima.

Parsinabul Ni Parboru: Mauliate ma amang boru, parhorason panggabean do hape hatana ido na taparsitta, tangiang nami ma tu amanta Debata asa tamba nauli tamba na denggan ma dihamu. Alai marakkup do nauli mardongan do na denggan, siakkup songon nahuddul siudur songon na mardalan:

 Asatangkas ma uju ni purba, tangkasan uju angkola

Tangkas ma hita maduma tangkasan ma nang mamora,

Asa adong sibegeon ni sipareon sitiopon ni roha tangkasi amang boru ma siangkup ni parhorason panggabean i botma.

Parsinabul Ni Paranak: Di hamu sude tulang nantulang name, tangkas ma paboaon nami siakkup ni parhorason panggabean i:

Ro alu alu ni anak nami naung tangkas marsitandaan anak nami dohot boru ni rajai, didok tuhami: amangtua laho ma hamu mandapothon tulangi raja…..marga…..ai nungnga dos roha nami, nungnga marsihaholongan, satahi sapakkilalaan hami, marskkap mamukka parsaripeon. Raja nami tarsonggot do hami, umbege alu alu ni anak nami I, ala hutanda hami diri nami lumobi di sijamaon ni tangan nasoada, alai tulang, ala adong hata ni natua tua mandok molo mgodang bulu i denggan ma binaen hite, molo mgodang anak manang boru denggan ma i marhot ripe, alai holong i ma na mangonjar roha nami umbahen na sahat hami tu bagas ni rajai, siat elek elek nami, marsomba hami sappulu jari jari, pasappulu sada simanjujung, ro hami tu adopan ni rajai, asa unang holan hata ni naposo be hata ni nasida na dua i, asa gabe hata ni natua tua mai, jadi napatua hata ma haroro nami songon ima raja nami.

Parsinabul Ni Parboru: Maulite ma amang boru, nungnga ditangkasi amang boru be na uli nadenggan mai, ai ido tutu, molo magodang bului denggan ma antong binahen hite molo magodang anak manang boru I denggan ma hot ripe, jadi na patua hata ma haroro ni amangboru. On pe amang boru, andorang so nipasahat partikkion on tu hami namarhaha anggi, boru nang dongan sahuta, ise ma goar ni boru nami nanaeng parumaen muna i dohot anak ni amngboru nanaeng hela nami i?

Parsinabul Ni Paranak: Ia goar ni anak nami………………………..goarni boru ni rajai……..ima raja nami!.

Parsinabul Ni Parboru: Boru nami, patakkas hamu jolo anggi mu, pariban muna, atik adong dijalo hata ni anak ni amang borutta namrgoar………………..(dialusi pariban/namboru na)

Parsinabul Ni Paranak: ”Asa dihita na mardongan tubu, boru, bere, raja ni dongan sahuta nami asa talehon pandapotta. Jala parjolo ma sian dongan tubu, haha doli/anggi doli, Boru, Bere, Dongan Sahuta.”

Hata sian haha doli/anggi doli, Boru, Bere, Dongan sahuta manolopi nauli nadenggan sude. Jala ndang apala ris jala sude manghatai, alai porlu do dilehon tingki tu nasida.

“Mauliate ma dihamu saluhutna. Jadi nuaeng pe hupasahat ma jolo tu suhut nami di jabu on.

3. SUHUT/PAIDUA NI SUHUT:

“Mauliatema, molo sian hami, mulana pe nungnga tangkas hupasahat tu hamu haha/anggi. Sisada hata ma hita,bulung ni dakkana do bulung ni rattingna,ulaon ni hahana do ulaon ni angina. Ima sian hami hasuhuton. Botima!”

Parsinabul Ni Parboru: “Jadi dihamu Raja ni pamoruon nami, nungnga dibege hamu angka pandapot sian hami. Nunga satolop hami asa hujalo hami ma haroromuna di napatua hata. Sai didongani Tuhanta ma hita sude jala dipasu-pasu angka ulaonta. Botima! Horas ma dihita saluhutna. (DITORUSHON TU NA MARHUSIP)

Parsinabul Ni Paranak: ”Mauliate. Malambok pusu rohanami Tulang, di naung tangkas dioloi hamu elek-elek pangidoannami di napatua hata. Sahali nari, mauliate ma di hamu.

“Alani i Tulang, songon i do huroa pangalahona, molo tung siat muse elek-elek pangidoannami, asa tapanakkok ma pakhataionta nian tu namarhusip husip na gogo manang mangarang-rangi di angka ulaon na mangihut, na mardomu tu sangkap(rencana) parsaripeon ni anaknami dohot boru ni raja i, marlambas roha ma raja i mangoloi pangidoannami. Botima.”

Parsinabul Ni Parboru: ”Mauliate di raja ni pamoruonnami. Andorang so hualisi hami lehon hamu jolo tingki, asa mangalap hata pados tahi  hami angka namarhaha anggi, boru, bere, nang di Raja ni dongan sahutanami.

Ditariashon ma tu sude horong ni parboru i taringot tu ulaon parhusipon. Jala sude manalopi (setuju).

4. MARHUSIP HUSIP NA GOGO

Parsinabul Ni Parboru: “I pe di hamu Raja ni pamoruonnami, taringot tu pangidoanmuna i hujalo hami ma i, manang songon dia husip-husip manang rencanamu. Hupasahat hami ma tingki tu hamu. Botima!”

Parsinabul Ni Paranak: ”Gabe jala horas ma Tulang. Nunga las ni rohanami. Songon nahudok hami nangkin,di haroronami tu bagasmuna on ala ni alu-alu ni anaknami mangonjar roha nami ro tu bagasmuna on,jala sai dihatahon do tu hami haburjuonmuna. Santabi ma Rajanami, didok natua-tua, ida-ida do tu nabutong, jora-jora tu namale. Asa nunga tangkas huida hami di haburjuonmuna marboru.

Di hamu Tulang/nantulangnami, dohot sude hamu na huparsangapi hami. Sian hami pamoruonmu mangido mangelek hamu, asa tung sangap hamu, Rajanami: Alaponnami ma boru ni Raja i sian tonga-tonga ni bagas on. Jadi alap jual ma Rajanami, jala ulaon sadari ma nian (paulak une).

“Taringot tu somba ni uhum, somba ni adat manang sinamot, Rajanami, nungan dos rohanami dohot tahinami, asa sisahali manglekhon, sisahali manombahon ma hami tu hamu, Rajanami, sinamot ni boru ni rajai. jala ulaon sadari ima jolo elek-elek pangidoannami.”

Parsinabul Ni Parboru: ”Mauliate ma di Raja ni Pamoruonnami……”

“Nunga tangkas hubege hami pangidoan muna i, i ma di rencana ulaon alap jual, jala ulaon sadari,dohot dina sihalai manombahon hamu di sinamot ni borunami.”

“Alai, ndang namarhata sinamot do pe hita Amangboru. Songon pangidoanmuna nangkin, namarhusip-husip dope hita di tingki on. Alai nadenggan ma i tutu  ingkon jolo nirang-rangan do angka nanaeng ulaonta haduan. Asa hupasahat hami ma jolo panghataion on tu hami na mardongan tubu, boru, berenami, nang di Raja ni donagan sahutanami.

HAHA/ANGGI DONGAN TUBU Dihamu pamoruonnami…….,taringot di ulaon alap jual dohot ulaon sadari, mauliate ma. Alai molo taringot tu sinamot ni borunami, tung tangkas jala godang pasahat hamu, asa las rohanami hula-hulamu, lumobi ma I ala didok hamu di hami do ulaon. Asa ndang apala horbo dohot angka mas hupangido hami, alai tangkas ma godang bahen hamu, Amangboru. Botima!”

BORU,BERE,PARIBAN: ”Molo sian hami, songon nadidok ni hula-hula/tulangnami nangkin do. Asa las roha nasida, pasahat hamu godang sinamot ni paribannami i. Botima…..!”

DONGAN SAHUTA: ”Mauliate ma di hasuhutonnami di jabuon na mangalehon tingki manghatai tu hami. Sian hami, molo dung dos rohamu, denggan masipa olo-oloan, na marhula-marboru asa dapot ma tarida di songon hata ni tua-tua:

Bona ni aek puli ma didolok Sitapangan

Gabe jala dapot ma di hamu angka na uli ala naung tangkas

Masipaolo-oloan,

Gabe ma jala horas sian hami dongan sahuta, botima.

Parsinabung  Ni Parboru: ”Dihamu Raja ni Pamoruonnami, nunga apala tangkas dibege hamu diangka panghataion dohot pangidoan sian hami. Taringot di pangidoanmuna, ulaon sadari,hujalo hami ma i. Alai taringot disinamot ni borunami, didok hamu sahali manambahon, asa tung tangkas godang pasahat hamu.

Didok natua-tua,

Nunga pitu lilinami, pauala jogiannami,

Nunga uli nipinami, ai gok ma sinamot di hajutnami.

“Ipe Raja ni Boru, huoloi hami ma pangidoanmjuna i jala tangkas ma hatahon hamu sian i.”

Parsinabung Ni Paranak:  ”Mauliate ma di hamu Rajanami…….!”

“Suang songoni i di paribannami dohot Raja ni dongan sahuta ni Raja i. Malambok pusu jala lumbang panghilalaannami di naung tangkas dioloi hamu angka pangidoannami. Suang songon i di sinamot ni Boru ni Raja i,na naeng parumaennami,ima sitombul rambu pinudun.andorang so huhatahon hami mangido tikki ma jolo hami.Dihamu boru nami asa barani hami manghatahon, tu hula hula nami hupangido hami panukkolion sian hamu.

Boruni Paranak ………………………………………………….songoni ma hata sian hami boru mauliate ma.

Parsinabung Ni Paranak: Mauliate ma dihamu boru nami.

Jadi raja nami, ia godang ni sinamot na laho sipasahatonnami Rajanami, Rp……………ma. Asa las ma rohamu jala gabehon hamu ma i Rajanami. Botima….!

Parsinabung Ni Parboru: ”Mauliate ma di Raja ni Pamoruonnami, nunga tangkas hubege hami sinamot ni borunami, godangna Rp…………. Jadi di hita pe na mardongan tubu, lumobi hasuhutonnami, songon i di boru,bere dohot dongan sahutanami, ala nungnga dos rohanta jala taoloi nangkin pangidoan ni pamoruonta, ba taoloi jala tagabehon ma i.

“Alai, di hamu Raja ni Pamoruonnami, taringot tu jambar na gok ima suhi ni ampang na opat dohot panandaion, asa tangkas muse pasahat hamu tu hami. Taringot tu bilanganna, hupasahat hami ma tu hamu haduan marhite suhutnami.”

4. SIJALO SUHI NI APPANG  IMA NA NIDOK

1.Sijalo Bara = (Amang Tua/Amang uda ni Boru Muli)

2.Simandokhon/Simanggokhon = (Iboto ni Boru Muli Naung Hot Ripe)

3.Parorot/Sihutti Appang = (Haha ni Boru Muli Manang Namamboruna),

4.Tulang = (Iboto ni Inang ni Boru Muli)

Catatan: Sinamot ndang tarmasuk suhi ni ampang naopat,alai upa suhut ma i langsung tu nampunasa boru muli.  Taringot tu panandaion,boi ma ditorushon tu:

Haha-Anggi,Anak manjae sian namartinodohon ni hasuhuton.

Ompu suhut ni namuli

Ompu Bao ni namuli

Parorot (namboru ni boru muli)

Paidua ni suhut,sian angka ompu namartinodohon,Dst.

Parsinabung Ni Parboru: ”Naparlu muse tahe Amangboru,taringot tu si jalo tintin marangkup,tu haha parhundulnami,tulang ni nanaeng helanami,narap paradehon ma hita di ulaon i muse.”

Parsinabung Ni Paranak: ”Nauli mai Rajanami.”

Parsinabung Ni Parboru ”Dihamu Raja ni Pamoruonnami. Asa dos tuatna,dos nangkokna, molo tung adong sidohonon manang pangidoanmuna tu hami, hupasahat hami ma tingkion tu hamu.”

Parsinabung Ni Paranak: ”Mauliate ma Rajanami. Adong do sipangidoannami tu hamu. Namauas jala masihol do hami diangka tangiang dohot pasu-pasu sian hamu Rajanami. Jala molo siat elek-elek pangidoannami,asa sude ma hami pamoruonmuna uloshonmu dohot ulos herbang diulaon i muse. Songon i ma pangidoan nami.”

Parsinabung Ni Parboru: ”Posma rohamuna Amangboru,sude do hamu pasu-pasuon nami, lumobi ditangiang nami. Alai songon ulos herbang sipasahaton nami tu hamu, bilanganna 11(sampulu sada)lembar ma. On ma sipamasa onta di anggaran dasar dohot anggaran rumahtangga PARSADAAN PUNGUAN PARNA. Alai sude do hamu muse mandapot ulos nang pe sian ulos-ulos natinonun sadari.”

“Hombar tusi tahe amangboru, taringot tu ulos-ulos i dohot pinggan panganan, dos marohanta ate, asa masialusi di ibana be ma hita Raja ni Boru?”

Parsinabung Ni Paranak: ”Mauliate ma Rajanami. Hujalo jala hugabehon mai.”

Parsinabung Ni Parboru: ”Naporlu muse hataanta ima taringot tu teknis ni ulaon, ari ni ulaonta i, tempat(gedung), angka undangan. Hombar tusi, dumenggan ma pinasahat tu suhut nami dibagas on.

Paidua Ni Suhut :”Mauliate ma di parsinabung nami. Tarsongon on ma konsep manang rencana nami:

  • Partumpolon di Gereja ……….tanggal……. Pukul…….(MOLO PROTESTAN)
  • Pamasu-masuon  tanggal……..digereja(tempat)…….,dst
  • Ulaon ujuk(pesta) dialaman ni parboru       : gedung……….,dst
  • Godang ni undangan tu paranak                  :………lembar,dst
  • Dohot angka naasing dope.

Parsinabung Ni Parboru:”Mauliatema disuhut nami. Jadi di hamu Rajani Pamoruonnami, taringot diangka parjambaron, nasomal mai ate? Jala sidapot solup ma hamu pamoruon nami Taringot tu namarsibuha-buhai, laos di bagas on ingananna, ala tamulai ma pukul ……. Boha Raja ni Boru,nunga uli rohamuna disi?

Parsinabung Ni Paranak: ”Nauli jala nungga denggan i Rajanami. Alai molo boi botoan nian, antar songon dia panjuhuti di ulaon i Rajanami?”

Parsinabung Ni Parboru: ”Nunga dihusiphon suhut nami. Molo panjuhuti ima(namar miak-miak/lombu sito dst). Ido Amangboru.”

“Ala nungnga hira sude tahatai, tarang-rangi di sangkap ni ulaonta, saonari sahat ma hita tu namarhata sigabe-gabe. Hami sian hula-hula ma napasahaton jala mangampu ma sian hamu pamoruonnami, ate! “

“Jala santabi ma hita saluhutna, ala mardalan do tingki,jala ndang pola namangurangi angka holong di hita,dos ma rohanta asa langsung ma pinasahat tu hasuhuton. Botima!

Hasuhuton/Paidua Ni Suhut Sian Parboru: ”Mauliate ma dihita saluhutna,  lumobidi Tuhanta. Jumolo hupasahat hami mauliate di dongan tubu haha/anggi,raja ni boru, bere, dohot raja ni dongan sahuta nami,ima di naung rade rohamu mandongani hami……dst. Suang songoni di pamoruonnami marga…….,dohot uduranna…….dst.

Parsinabung Ni Paranak: ”Hita pe naro tu bagasan ni hula-hulanta dison, dos ma rohanta. Molo namangampu hata nauli nadenggan sian hita. Langsung ma tu haha/anggi doli hasuhutonnami. Botima!”

Suhut/Paidua Ni Suhut: ”Mauliate ma di Tuhanta, mauliate ma di hamu sude hula-hulanami, pariban,dst……

Parsinabung Ni Parboru:”Nungnga denggan mardalan ulaonta sadari on,jala nunga godang tahatai, tarang-rangi na hombar tusi, jadi asa mardalan ma ingot-ingot(hepeng).

(Nunga diparade hian hepeng laho ingot-ingot i. Dipasahat pihak paranak ma i tu parsinabung ni Parboru, jala dipaulak ma muse sebagian tu pihak parank,jala somal ataida adong induk ni ingot-ingot i). dihatahon ma hepeng ingot-ingot i:”Asa ingot ma hita di angka sangkap dohot ulaonta i.” Diolphon natorop.

Parsinabung Ni Parboru :”Boha Amangboru…..!!Ala nunga renta jala singkop beulaonta, asa taunjungi(Tatutup) di bagasan ende dohot tangiang. Boha Amangboru ise ma manutup?

Parsinabung Ni Paranak: ”Mauliate ma Rajanami……Sianhamu ma manutup….”

Parsinabung Ni Parboru: ”Dos ma Rohanta. Ala dison do ampara niba……ba pinasahat ma tu nasida.”Marende jala ditutup ma dohot tangiang. Sambil mangaso(istirahat) satongkin, manghata-hatai, dihobasi boru ni hasuhuton parboru ma dapur siboanon ni paranak, ima dengke, songon ulak ni sipanganon na binoan ni paranak, laos tu pani manang sambong nai ma dibaen,jala tangkas dipasahat tu pihak paranak. Masijalangan ma jala marhehe nauli ma angka tutur. Ima sahatna,gabe ma jala horas!

CATATAN: Diacara marhusip (mangarang-rangi), molo pangoli na naeng mangalap paribanna(Boru ni Tulang) laho gabe Ripe(istri), porlu ingoton:

*Tingki na mangelekhon somba ni adat berupa sinamot parhata ni paranak, unang be mangihut hata “SITOMBOL”manang”RAMBU PINUDUN”,songon i hata”ULAON SADARI”.

Alana, paribanna do dialap pangoli jala napatio mata ni mual na do i muse. Alai sudena tu dos ni roha ma.

*Tulang ni pangoli unang be didok sijalo tinti marangkup, alai gabe sijalo surung-surung ma i.

*Ulaon sadari (paulak une) dipatupa di ari namangihut sesuai tu dos ni roha ni parboru dohot paranak.Khusus tu bentuk ni ulaon taruhon jual (ulaon adat di alaman paranak) di tingki namarhusip/mangarang-rangi,asa dengan jala sangap,sian pihak parboru ma parjolo mangido asa paranak paradehon amak tiar dohot angka nahombar tu ulaon adat i. lapatanna,hata i unang parjolo ditariashon paranak,husip=husip sian suhut paranak tu suhut parboru manang tu parhata ni parbor

5. JAMBAR JUHUT

Molo taida di ulaon adat na masa di tano parserahan on,angka si jalo parbagian jambar juhut di ulaon adat paradation  ima:

  • Jambar ni hasuhuton dohot namrhaha-maranggi
  • Jambar ni Boru/Bere
  • Jambar ni dongan sahuta,
  • Jambar ni pariban,
  • Jambar ni hula-hula(hula-hula ni suhut;namarhaha-anggi,anak manjae)
  • Jambar ni tulang(tulangni ama hasuhuton dohot tulang ni ina hasuhuton)
  • Jambar ni bona tulang(tulang ni ompu suhut)
  • Jambar ni bona ni ari(hula-hula ni ompu suhut).

Nian adong dope angka si jalo jambar i ma: tu pangula ni huria,punguan dohot angka na asing dope. Alai, nauli ma saluhutnai jala disesuaihon ma pambagian I tu bentuk ni ulaon dohot panjuhutina. Saonari porlu ma muse botoon ta angka dia ma jambar sipasahaton tu horong ni sijhalo jambar i. hombar tu si,parjolo ma pinatorang saotik taringot tu namanghasuhuton,na marhadomuan tu tahapan manang proses ni namarbagi jambar juhut.

Goar ni angka jambar juhut:

  1. Namarmiak-miak(Pinahan Lobu)
  • Namarngingi (parsanggulan,ulu,kepala bagian atas,tempat otak)
  • Osang (kepala bagian bawah,siloja-loja tingki mangalu-ngalu)
  • Aliang–aliang(leher biasana siseati doon tingki mangan)
  • Somba-somba(rusuk depan dipotong melingkar,unang putus)
  • Soit(buhu-buhu dari kaki)
  • Ihur-ihur
  1. Sigagat Duhut(Lombu/Horbo)
  • Namarngingi (parsanggulan,ulu,kepala bagian atas,tempat otak)
  • Osang (kepala bagian bawah,siloja-loja tingki mangalu-ngalu)
  • Tanggalan(aliang-aliang molo dipinahan lobu)
  • Panamboli /ungkapan
  • Somba-somba ima rusuk(rusuk galapang,ima somba-somba nagok,rusuk na mardomu di jolo)
  • Buhu-buhu(soit molo pinahan lobu)
  • Ihur-ihur
  • Pohu (tanggo-tanggo,jagal)

Molo sian daerah silindung humbang sekitarna do marulaon (hasuhuton),sai jumolo do dipasahat jambar taripar tu horong ni hula-hula dohot tulang. Jadi parpudi do jambar dibagi tu hasuhuton. Alai,molo namarulaon(hasuhuton),sian toba sekitarna,sai jumolo do dibagi nasida jambar tu suhut namarhaha maranggi asa mangihut jambar taripar tu hula-hula manag tulang. Songon i jambar osang sai tu boruna do i dipasahat. Hape molo di silindung-Humbang,jambar osang tu hula-hula do dipasat. Alai sude nai sai manghorhon tu nauli nadenggan do molo sian angka dos ni roha.

Pambagian jambar juhut di ulaon pamuli boru/pangolihon anak, alap jual/ mang alap jual na masa jala somal taulahon di Jakarta sekitarna,hira songonon ma.

  1. Sibagi dua do tudu-tudu ni sipanganon naung dipasahat Paranak tu Parboru.Nang pe dipasahat Paranak tu Parboru tudu-tudu ni sipanganon i marhite-hite hata manang pandohonan na elek dina pasahaton,alai dung sidung marsipanganon disungkun suhut manang Raja Parhata ni Parboru do muse Paranak taringot tu tudu-tudu ni sipanganon i,songon naung pinatoranag di panghataion di ulaon marhata sinamot/marhusip. Alai,somalna,molo ihur-ihur sai jambar tu pihak parboru do I,nang pe diulaon taruhon jual ,i ma ulak ni tandok ni parboru.
  2. Dungi dibagi dua tudu-tudu ni sipanganon i,dipasahat Parboru ma muse jambar bagian ni paranak,hombar tu panghataion dohot dos ni roha nasida. Dung i dibagi Parboru dohot Paranak ma muse jambar i tu angka tutur na be.

Catatan: Masa niida hira dipangido paranak sian parboru saotik sian jambar ihur-ihur di nasida asa adong bagionna tu tuturna(dongan tubuna). Diulaon pesta ujuk somalna dipatupa sampe 8 (ualu)soit,asa 4(opat)soit di Parboru,4(opat) soit di Paranak,jala di deba ulaon osang pe dibagi dua do. Masa do diida muse niida dipasahat Parboru jambar juhut tu haha parhundulna(tulang ni Pangoli),jala nadenggan ma tutu i.

  1. Pambagian jambar sipasahaton ni Parboru dohot Paranak hira songon naadong do di tabel berikut ma:

Jambar Juhut Sipasahatoni Paranak:

Sijalo jambar Silindung/Humbang Toba
Sude horong ni hula-hula Somba-somba Somba-somba
Boru/Bere -Namarngingi(Hambirang) – Namarngingi(Hambirang)

-osang

-Pariban

-Pungula ni Huria,

-Dongan sahuta,

-punguan

 

Dibuatsian soit,pohu

 

Dibuat sian soit,pohu

 

Jambar Juhut Sipasahaton Parboru:

Sijalo jambar Silindung/Humbang Toba
Suhut Ihur-ihur,soit Ihur-ihur,soit
Hula-hula Osang Namarngingi
Tulang Namarngingi(siamun) Namarngingi, somba-somba
Boru/Bere Namarngingi(hambirang) Osang
-Hula-hula ni marhaha-anggi

-Hula-Hula ni anak manjae

-Tulang Rorobot

-Bona tulang

-Bona ni ari

Somba-somba Somba-somba
-Pariban,

 

 

 

-Pangula ni huria,

-Dongan Sahuta

Soit,pohu  

Soit,Pohu

 

             -Punguan

 

Dibuat sian jambar ni suhut Dibuat sian jambar ni suhut

 

  • Diulaon tardidi,malua,manuruk jabu,molo jambar ihur-ihur hot ma I di hasuhuton. Osang, namarngingi parsiamun,dohot somba-somba tu horong ni hula-hula dohot tulang. Soit ma tu dongan sahuta dohot pariban. Namarngingi parhambirang ma dipasahat tu boru/bere.
  • Diulaon patua hata/marhusip,pasahat ulos mula gabe,paebathon anak buha baju,ia panjambaron pada prinsipna hira-hira surung-surung ni hula-hula ma i. Alai,somalna,sian hula-hula denggan do marnida situasi. Molo tung pe didok paranak (pamoruon nasida) jambar surung-surung,boi do I dialap hata muse. Molo ditingki ulaon I adong anka dongan tubu ni pamoruonna I mandongani nasida,ingkon adong ma nian tinggal sebagian jambar I asa adong lehononna tu nasida.
  • Pambagian jambar dohot panjuhuti di ulaoan sari-matua dohot saur matua saguru tu keputusan ni pangarapoton(tonggo raja) do i. adong do namangalehon ihur-ihur tu hula-hulana,ulu ma tu tulang,jala somba-somba tu horong ni hula-hula naasing termasuk tulang dohot bona tulang.

Alai nasomal muse taulahon di Jakarta sekitarna,molo ihur-ihur hot mai di hasuhuton dohot marhaha-anggi,jala jambar tu horong ni sude hula-hula dohot tulang dipatupa sian somba-somba. Asa nauli jala denggan mai sude as alma sian panghataion tu dos ni roha,jolo disseat ma asa disseat raut ,jala taingot ma hata namandok,”Hata do parsimboraan.”

  • Namarngingi parsiamun:Hula-Hula
  • Namarngingi hambirang:Tulang
  • Osang parsiamun:Pariban(boruni hula-hula)
  • Osang Parhambirang:Sude boru
  • Somba-somba:Angka tulang dohot Hula-Hula
  • Soit:Sihal-sihal(termasuk dongan sahuta)
  • Ihur-ihur:Hasuhuton(suhut dohot dongan tubu)

Boi do molo tu hula-hula pintor di pasahat namarngingi sambariba,osang sambariba,satonga somba-somba,dos ni roha doi.

Ulaon dialaman/Gedung tingki pesta ujuk,(pinahan lobu manang sigagat duhut)sude jambar dibagi dua kecuali ihur-ihur. Satonga di paranak bagian parhambirang,satonga di parboru

bagian parsiamun. Ihur-ihur ulak ni jual ni parboru.

Sihotang

JAKARTA: 26 Augustus 2012
Disusun oleh :Hoat Sihotang
Redaktur: Hisar 
alterntif text

LEAVE A REPLY

Please enter your comment!
Please enter your name here